原文（Hoh saw daj 《Daj Suenbaknywj Daengz Ranzsaw Sanhvei》 aeu）：

不必说碧绿的菜畦，光滑的石井栏，高大的皂荚树，紫红的桑椹；也不必说鸣蝉在树叶里长吟，肥胖的黄蜂伏在菜花上，轻捷的叫天子(云雀)忽然从草间直窜向云霄里去了。单是周围的短短的泥墙根一带，就有无限趣味。油蛉在这里低唱，蟋蟀们在这里弹琴。翻开断砖来，有时会遇见蜈蚣；还有斑蝥，倘若用手指按住它的脊梁，便会啪的一声，从后窍喷出一阵烟雾。

译文（ciuq douzgauj bien gonq bien laeng fat）：

It

Gaej yungh gangj naeuz gij fogbyaek heuswdswd haenx lo, gij rin humx henzcingj wenjmyabmyab, gogyoeg hungsang, maknengznuengx gyaemq; hix gaej gangj naeuz duzbid youq ndaw mbawfaex heuh yenghyengh yaekyaek, duzdoq bizbwdbwd douh youq gwnz va’byaek, duzroeglaejdiuqmbwn ndangmbaeu he sawqmwh daj ndaw guenghhaz ndonj okdaeuj, fit couh mbin hwnj byaifwj bae lo. Dan dwg youq gij ciengznamh daemqbyumbyum seiqhenz gizgyawj haenx couh miz haujlai yinxdaeuz bw. Daekdaeq youq gizneix heuh gitgit gaekgaek mbouj dingz gvaq, gyoengq daekgaeuj hix youq neix ndaek gimz ciengqgo. Fan hai ciendonh gvaqdaeuj, mbangjbaez lij raen duzgip dem; lij miz duzbanhmauz dem, langh yungh lwgfwngz nap baihlaeng duz de couh hongz dwk “byop” baez ndeu, daj laenghaex duz de byoqok gaemz hoenz he daeuj.

（平果 Vangz Gijveiz hoiz/黄启维 译）

Ngeih

Mbouj yungh gangj fogbyaek heusausau, baengh cingjrin raeuzradrad, go’gyoeg sanghung, dumhnengz gyaemq; hix mbouj yungh gangj duzbid youq ndaw mbawfaex ciengqngwngngwng, duzdinz biz boemz youq gwnz va’byaek, roeglaejdiuqmbwn riengj sawqmwh daj gyang nywj soh byongh daengz byaifwj bae lo. Dan rangh seiqhenz giek ciengznamh dinj, couh miz yinx fouzsoq. Duzyouzlingz youq gizneix ngon go, gyoengq daekgaeuj youq gizneix danz gimz. Fan hai cien raek, mbangjseiz ndaej bungqraen sipndangj; lij miz nengzbanhmauz, danghnaeuz yungh lwgfwngz nyaenx baihlaeng de, couh yiengj gwj ba sing ndeu, daj conghhaex setok raq hoenz ndeu. 

(金城江 Cwngz Gozbinh/程国斌)

Sam

Mbouj yungh gangj suenbyaek heusausau, gvaenghcingjrin raeuzratrat, faexyangzgenj sangngaungau, lwgnengz gyaemqgwtgwt, hix mbouj yungh gangj duzbid youq ndaw mbawfaex ngonngwngngwng, duzdinz bizbodbod boemz youq gwnz vabyaek, roeglaejdiuqmbwn riengjret sawqmwh daj ndawrum ndonj haeuj byaifwj bae lo. Gag dwg henz goek ciengznamh seiqhenz dinjdetdet, couh mizyinx fouzbeij. Duzyouzlingz youq gizneix ciengqngwngngwng, gyoengq daekgaeuj youq gizneix danz ginz, biengj gaiq ciengoenq, mbangjbaez ndaej bungq daengz sipndangj, lij miz nonraiz, danghnaeuz aeu lwgfwngz nyaenx ndoksaen de, couh miz sing “ba”, daj baihlaeng cotok raq hoenz ndeu. 

（忻城 Loz Lanzgyauh/罗兰姣）

Seiq

Mbouj yungh gangj ndaw suenbyaek heuswd, bak cingjrin lwenqdwk, golwgsaeg sangngau maksangh ndingndaem; hix mbouj gangj duzbid youq ndaw mbawfaex ciengq ngon; duzdoq bizbwdbwd bomz youq gwnz va’byaek, roeglaejdiuqmbwn daj caznywj mbin haeuj ndawfwj bae. Gag dwg laj giekciengz, couh gig mizyinx. Duzyouzlingz youq gizneix ciengqgo, daekgaeuj youq gizneix danz ginz. Fan hai ciendonh daeuj, mizseiz lij raen duzsip, lij miz duzbanhmauz, danghnaeuz yungh fwngz anq gij ndoksaen de, de couh fatok “ba” sing ndeu, youq caekhaex byoqok raq hoenz ndeu.

（环江 Veiz Gyahmanj/韦佳满）

Haj

Mbouj yungh gangj fogbyaek heuseuseu, baengh cingjrin wenjlili, go’gyoeg hungsang, makgosangh gyaemqhoengz de; hix mbouj yungh naeuz duzbid youq ndaw mbawfaex heuh mbouj dingz, duzdinz bizbwdbwd naengh youq gwnz vabyaek, duzroeglaejdiuqmbwn heuhcici, sawqmwh daj caznywj ndonj haeuj ndawfwj bae lo. Cijmiz seiqhenz dinjdetdet rangh goekciengz, couh yinxdaeuz dangqmaz. Duzyouzlingz youq gizneix ciengq singdaemq, daekgaeuj youq gizneix danz gimz. Fan ciengoenq yawj baihlaj, mizseiz bungz daengz duzsip; lij miz duznonraiz, danghnaeuz yungh lwgfwngz bae gaemh ndoksaen duz de, couh dingqnyi sing yiengjbaba ndeu, daj caekhaex byoqok raq hoenz ndeu.

（都安 Veiz Couyiz/韦绉怡）

Roek

Mbouj yungh gangj gij sekbyaek heuloeg, gij lanzrin aencingj ngaeuzvad, golwgsaeg hungsang, lwgsangh hoengzaeuj gyaeundei; hix mbouj yungh naeuz duzbid youq ndaw mbawfaex damzbyoed, duzdinz bizbwdbwd naengh youq gwnz vabyaek, roeglaejdiuqmbwn sawqmwh daj ndawnywj cig ndonj haeuj ndawfwj bae lo. Dan dwg rangh goek ciengznaez seiqhenz dinjdetdet haenx, couh miz gij yinxdaeuz fouzhanh. Youzlingz youq gizneix ciengq daemq, gyoengq daekgaeuj youq gizneix danz gimz. Fan gij cienduenh daeuj, mizseiz yaek bungz daengz gij duzsip de; lij miz duzbanhmauz, danghnaeuz yungh lwgfwngz nyaenx gij ndoksaen de, couh rox yiengj sing ndeu, daj laeng uk byoqok raq hoenz ndeu daeuj.

（凤山 Bwz Haij/白 海）

Caet

Mbouj yungh gangj gij hangzbyaek heusausau，lanzcingjrin lwenq， go’gyoeg hungsang， makdumhgai youh aeuj youh hoengz haenx, hix mbouj yungh gangj duzbid youq ndaw mbawfaex swenjsasa,duzdinz bizbwdbwd haenx seizneix cingq boemz youq gwnz va’byaek, gij roeglaejdiuqmbwn singqsad haenx sawqmwh daj ndaw byozrum couh ret daengz byaifwj lo. Dandan dwg seiqhenz gij ciengznamh dinjdet neix, couh miz haujlai yinxdaeuz. Daekswenj youq gizneix ciengqngwngngwng, gyoengq daekgaeuj youq gizneix danz ginz. Dawz ndaek cien fan gvaqdaeuj, mbangjseiz raen duzsipvaiz, lij miz duzbanhmauz, caenhnaeuz dawzfwngz bae goemh de, de couh bek sing ndeu, daj baihlaeng e hoenz okdaeuj.

（武宣 Cinz Lanzcingh/覃兰清）

来源：《广西民族报》壮文版 第八版 

责编：赵德飞 | 审核：唐 龙 | 复审：蒙树起 | 监制：韦秀观